Ye page batata hai ki Gatish kaunsa data rakhta hai, kyun rakhta hai, kitne din rakhta hai aur kaun dekh sakta hai. Jo yahaan likha hai, wahi system karta hai — isse zyada bhi nahi, kam bhi nahi.
Garage ka naam, pata, GSTIN, uske customer, gaadiyan, job card, estimate, bill aur payment. Ye sab us garage ka hai. Har garage ka data database mein alag se ghera hua hai (row-level security), isliye ek garage ka staff doosre ka kuch nahi dekh sakta — chahe link seedha khole.
Naam, number, gaadi ka number aur us gaadi ka service record. Ek garage ko doosre garage ki service history tab hi dikhti hai jab gaadi ka maalik khud haan kahe — ye switch app mein har gaadi ke liye alag hai aur kabhi bhi band kiya ja sakta hai.
Kisi customer ka number kisi doosre garage ko marketing ke liye nahi dete. Data bechte nahi. Aapke customer ko apne naam se offer ke message nahi bhejte.
Engine number, chassis number aur insurance policy number database mein encrypt karke rakhe jaate hain, aur screen par masked dikhte hain. Poora number sirf tab dikhta hai jab maalik khud us document ko khole.
Bill aur uske line item kanoonan record hain — GST ke hisaab se unhe saalon tak rakhna hota hai, isliye wo "delete" nahi hote. Baaki niji jaankari (naam, number, pata) hataane ki request par hataayi jaati hai.
App ya console mein Privacy screen se request dijiye. Har request par tareekh darj hoti hai aur 30 din ke andar jawab diya jata hai. Account hataane ki request wapas bhi li ja sakti hai.
Gatish ka support staff aapke garage ka data tabhi khol sakta hai jab wo "read-only" mode mein ho — us dauraan wo kuch badal nahi sakte, samay seemit hota hai, aur dono taraf record banta hai.